Новите биогасни централи во Македонија „свртеа“ 7 милиони евра за една година
Новите биогасни централи за производство на електрична енергија кои преку цела мината година активно испорачуваат струја за универзалниот снабдувач ЕВН Хоме заработиле вкупно 430 милиони денари, односно нешто повеќе од 7 милиони евра во 2024.
Се работи за четири нови биогасни централи кои од пред околу една година добија лиценци за работа, при што три од нив се на Вардар Био Процес, а четвртатата е на Био Ентерпрајс.
Наплатата на т.н. премиум тарифи е евидентирана во годишниот извештај на Регулаторната комисија за енергетика. Тоа значи дека активно струја од органски отпад правеле трите биогасни централи во Градско на Вардар Био Процес, чија сопственост е поврзана со бизнисмените Минчо Јорданов и Никола Деребанов преку земјоделскиот комбинат АД Вардар Градско, како и таа на Био Ентерпрајс во Сарамзалино на бизнисмените Кочо Анѓушев, Петар Колевски и браќата Петар и Спасе Спасески.
Вардар Био Процес од трите централи наплатил по околу 1,5 милиони евра, односно вкупно околу 4,5 милиони евра, додека онаа на Био Ентерпрајс му донела на друштвото заработка од 2,5 милиони евра.
Како ова се одразило на финансиското работење на двете друштва? Вардар Био Процес во 2024 заработил речиси 5 милиони евра како претпријатие и добивка од 82.000 евра, при тоа со просечен број на 11 вработени. Био Ентерпрајс има приходи од 3,2 милиони евра, а евидентираната загуба е 685 илјади евра.
Сумата доаѓа од тоа што за овие две компании, како и за сите останати биогасни централи доколку ги има во иднина, наплатата треба да биде 0,18 евроценти по киловатчас. Повластената тарифа е највисока за биогасните централи од сите видови на обновливи извори на енергија и ја плаќаме од сметките за струја како енергија која ЕВН како универзален снабдувач е должен да ја преземе.
Според проекциите на производство, излегува дека Вардар Био Процес и Био Ентерпрајс речиси направиле максимален учинок во првата година од своето работење. Вардар Био Процес ги пушти во погон централите последователно во јуни, јули и октомври 2023, додека Био Ентерпрајс тоа го направил во ноември истата година. Конечните лиценци за работа двете друштва ги добиле по одреден период од започнувањето со работа.
А.К.
