НОВИ САД: Најмалку осум загинати oткако се урна натстрешница на Железничката станица

Најмалку осум загинати има во несреќата што се случи денеска во Нови Сад. 

Тие настрадаа откако се урна настрешницата на Железничката станица во Нови Сад. 

„Од урнатините се извлечени осум тела, четворица се живи, на едно лице му се ампутирани нозете. Во контакт сме со две лица под урнатините“, изјави министерот за внатрешни работи, Ивица Дачиќ.

Дачиќ изјави дека спасувачите биле на местото на несреќата неколку минути по повикот.

„Во спасувањето учествуваат близу 80 спасувачи од повеќе градови. Акцијата е исклучително тешка“, објасни Дачиќ. 

Според премиерот Милош Вучевиќ, ова е еден од најтешките денови во повоената историја на Нови Сад и страшна трагедија. 

„Во име на Владата и на сите граѓани на Србија, сакам да изразам сочувство до семејствата на жртвите. И да им се заблагодарам на сите спасувачи кои се борат да им помогнат на луѓето под урнатините“, изјави Вучевиќ.

Тој додаде дека ќе инсистира да се најдат одговорните и оние кои морале да ги предупредат надлежните дека одредени работи мора да се поправат.