Нов срам за Работнички: Прекинат меч во „Градски парк“ – прокиснувал кровот (ВИДЕО)

Поради ужасната состојба со кровот на овој времен објект стар 53 години, денешната средба на вториот тим на центарци против Маџари во склоп на Втората лига беше прекинат по првото полувреме. Паркетот беше прекриен со вирови со вода поради протекувањето од врвот на салата, кои едноставно не можеа да се избришат за кошаркарите да имаат барем минимални услови за игра. Со цел да се избегне некоја повреда, официјалните лица решија да го прекинат дуелот по првите две четвртини при водство на Маџари со 43-26. Ова е само уште еден доказ дека „Градски парк“ треба дефинитивно да замине во пензија, бидејќи ситуацијата е ужасна и во соблекувалните, тоалетите се ужасни, а нив воопшто и ги нема за публиката на трибините.

Секое ново раководство како што доаѓа ветува изградба на нова арена на местото на храмот, некогашниот градоначалник на општина Центар, Андреј Жерновски, дури и промовираше нов проект кој требаше да почне да се гради, но од тоа не излезе ништо. По него дојде Саша Богдановиќ, кој го најавуваше истото, потенцирајќи дека само треба да се реши проблем со сопственоста на земјиштето под салата, што е во судска процедура. Сегашниот градоначалник, Горан Герасимовски, официјално нема дадено ветување за нова сала, но актуелната управа на Работнички летово бомбастично им соопштила на навивачите дека „Градски парк“ ќе добие ново руво достојно за играње дури и на првиот тим, што според денешните снимки, е далеку од реалноста и од вистината.