Нов пораз од Португалија, но Македонија не се посрамоти!
Иако епилогот стана јасен, веројатно, уште на паузата меѓу двете полувремиња, сепак, Македонија одигра конкурентно и достоинствено, давајќи максимум против фаворитот во групата. Всушност, околу 25 минути од првиот дел се играше рамноправно, дури и за нијанса со повеќе водства за Македонија, отколку за домаќинот во Матишињос, близу Порто.
Мотивирани да покажат повеќе од пред три дена во Скопје (23-29), македонските ракометари отворија со водство од 3-1 до шестата минута. Проблемот со осцилациите и неконстантноста повторно стапи во сила, па не беше прашање дали можеме да одиграме добро, туку дали знаеме да го одржиме тоа ниво низ минутите. Во следните седум никој од нашата напаѓачка постава не успеа да го совлада голманот на Бенфика, Капдевил.
Не искористивме и пенал, губевме и топки, па Португалците го свртеа резултатот (5-3). Македонија повторно фати приклучок и во следните десетина минути се играше во резултатска брканица и менување во предноста. Сепак, кога Мартин Серафимов реализира седмерец за 11-10 во 23. минута, никој не знаеше оти тоа ќе остане последен гол за Македонија во првиот дел. Португалија направи серија од 5-0 и замина на одмор со 15-11.
