НИСКОБУЏЕТНИОТ РАЈАНЕР ГИ ЗГОЛЕМИ ЦЕНИТЕ НА БИЛЕТИТЕ ЗА НАД 40 ОТСТО: Бројот на патници не се намали, очекуваат и повеќе
Ирската нискобуџетна авиокомпанија Ryanair денеска објави
скок на приходите во првиот деловен квартал благодарение на силната побарувачка
и повисоките цени, посочувајќи дека патниците не се повлекле од топлотниот бран
во Европа.
Во тримесечниот период до крајот на јуни, добивката по
оданочување е речиси четири пати поголема од истиот период лани и скокна на 663
милиони евра.
За 42 отсто повисока просечна цена на билетите
Приходите скокнаа за 40 отсто, на 2,6 милијарди евра, со 42
отсто повисока просечна цена на билетите и 11 отсто повеќе превезени патници.
Компанијата ја нагласува и ниската споредбена база во 2022
година, кога на резултатите влијаеше влегувањето на руските вооружени сили во
Украина.
Финансискиот директор Нил Сорахан рече дека патниците не
резервираат за поладна клима или откажуваат летови поради топлотниот бран во
Европа.
Пониски цени во зима
Кон крајот на јуни и почетокот на јули, цените за билетите
резервирани поблиску до датумот на поаѓање малку ослабнаа, а главниот извршен
директор Мајкл О’Лири рече дека ќе мора да ја стимулира побарувачката со
пониски цени оваа зима, бидејќи ќе треба да пополни 25 отсто повеќе места
отколку во 2019 година.
„Загрижени сме поради влијанието на макроекономските
движења. Инфлацијата, повисоките каматни стапки, поскапите хипотеки би можеле
да влијаат на личната потрошувачка во втората половина од годината“, објасни
О’Лири.
Ова на крајот би било добро за Рајанер бидејќи луѓето сепак
ќе патуваат, но ќе бидат почувствителни на цените, додаде тој.
Очекуваат скромен
пораст на добивката на ниво на годината
Во Ryanair и натаму се внимателни оптимисти и очекуваат
скромен раст на профитот во целата деловна година, додавајќи дека во ноември ќе
објават поконкретни насоки.
Тие во моментов очекуваат да превезат околу 183,5 милиони
патници во деловната година што завршува во март 2024 година, девет проценти
повеќе отколку во 2022/2023 година, што е малку намалување на нивната проценка
поради доцнењето на испораките на авионите на Боинг.
ФОТО: EPA/STRINGER
