Николов ја демантира Финансиска: Кривичната пријава е политички притисок пред избори
Градоначалникот на општина Росоман, Стојан Николов, денеска на прес-конференција остро ги демантираше наводите од кривичната пријава што против него ја поднесе Управата за финансова полиција до Основното јавно обвинителство во Кавадарци.
„Целосно ги отфрлам сите наводи во кривичната пријава од Финансовата полиција. Ова го оценувам како политички притисок пред избори. Ќе продолжам и понатаму да им служам на граѓаните одговорно, како и досега“, изјави Николов.
Николов најави дека ќе ја оспори пријавата со сите правни средства и потенцираше дека вакви потези, според него, имаат за цел да ја нарушат неговата репутација во чувствителен политички период.
Финансовата полиција вчера достави кривична пријава против градоначалникот.
Пријавениот С. Н во својство на Градоначалник на Општина Росоман, во текот на 2022 и 2023 година постапил спротивно на Закон за градење чл. 58 став 2 (Службен весник на РМ бр. 130/09, 124/10, 18/11, 36/11, 54/11, 13/12, 144/12, 25/13, 79/13, 138/13, 163/13, 27/14. 28/14, 42/14, 154/14, 194/14, 187/14, 44/15, 129/15, 217/15, 226/15, 30/16, 31/16, 39/16, 71/16, 132/16 и 35/18), а во врска со член 205 став 1 и чл. 209 од Закон за општа управна постапка (Службен весник на РМ бр. 38/05, 110/08, 124/15 и 65/18) на начин што изготвил 6 лажни јавни исправи, од кои 4 одобренија за градење и 2 одобренија за реконструкција на улици, истите во текот на 2022 и 2023 година ги употребил како вистински во правниот промет, а при тоа иако бил должен не ги водел во јавната евиденција, односно, во информацискиот систем „е-Одобрение за градење“, на кој начин за период од 2022 до 2024 година искористени се парични средства во износ од 14.023.318 денари обезбедени од страна на Центар за развој на Вардарски плански регион – Биро за регионален развој, парични средства во износ од 6.740.517 денари обезбедени од страна на општина Росоман и парични средства во износ од 15.134.066 денари обезбедени од страна на Министерство за транспорт, на кој начин спротивно на законските прописи за период од 2022 до 2024 година со изготвување на 6 лажни јавни исправи, одобренија за градење и реконструкции на штета на буџетот на општина Росоман, Центар за развој на Вардарски плански регион – Биро за регионален развој и Министерство за транспорт противзаконски искористени се парични средства во вкупен износ од 35.897.901 денари со што пријавениот го сторил кривичното дело ФАСЛИФИКУВАЊЕ ИСПРАВА чл. 378 став 1 и 3, а во врска со член 45 од КЗ на РСМ.
