Николоски: Се преговара за нова авиолинија од Будимпешта до Охрид
Министер за транспорт, Александар Николоски изјави дека Владата активно преговара со авиокомпанијата Визер за отворање на нова авиолинија помеѓу Будимпешта и Охрид. Според Николоски, оваа линија е поатрактивна заради туристичките потенцијали на охридското крајбрежје, што ќе ја направи популарна за посетителите.
„Туризмот на Охрид ќе добие значајно поттикнување, а ние активно развиваме нов модел за привлекување нови авиолинии. Очекуваме дека овој модел ќе донесе најмалку десет нови дестинации, а потенцијално и до дваесет нови авиолинии во краток период“, изјави Николоски во интервју за Радио Лидер.
Во однос на моменталниот модел на субвенции, Николоски истакна дека овој систем веќе дава резултати, со десет нови авиолинии за само неколку месеци. Министерот изјави дека субвенциите за патници во доаѓање во Македонија варираат – 9 евра за патници кои слетуваат во Скопје и 12 евра за оние што патуваат до Охрид.
„Ние сме подготвени да ги зголемиме субвенциите за авиокомпаниите под услов тие да отворат најмалку 10 нови дестинации во исто време“, додаде Николоски во интервју за Радио Лидер.
Во контекст на авиосообраќајот, тој ја нагласи важноста на чартер летовите, посебно на оние на авиокомпанијата „Фрибирд“, кои играат клучна улога во зголемувањето на туризмот и авиосообраќајот. Амбицијата на Министерството за транспорт е да се обезбедат два чартери дневно на охридскиот аеродром.
Николоски се осврна и на напредокот во инфраструктурните проекти, истакнувајќи дека активно се градат четири нови автопати во Македонија: Охрид-Кичево, Гостивар-Букојчани, Гостивар-Тетово и Прилеп-Битола. Според него, ова претставува голема мобилизација на ресурси и покажува капацитет на администрацијата.
„Паралелно со изградбата на овие автопати, се реализираат и големи проекти за изградба на експресни патишта, како што се експресниот пат од Страцин до Крива Паланка и Прилеп – Градско. Исто така, во тек е изградбата на железничката пруга Бељаковце – Крива Паланка“, изјави Николоски во интервју за Радио Лидер.
Вицепремиерот додаде дека, во контекст на Коридор 8 и 10д, за само десет месеци, оваа Влада експроприрала пет пати повеќе парцели отколку претходната влада за две години.
