Николоски најави автопатско поврзување на Битола со Скопје до 2029 година
На денешниот Саем-Отчет по повод „4 години работа за тебе“, министерот за транспорт, Александар Николоски, истакна дека во соработка со Јавното претпријатие за државни патишта се работи на проект за целосно автопатско поврзување на Битола со Скопје.
Николоски нагласи дека автопатската врска се очекува да биде завршена во периодот 2028-2029 година и дека таа ќе има позитивно влијание врз бизнис климата во Битола и целиот регион.
„Во моментов работиме на еден огромен проект за целосно автопатско поврзување на Битола со Скопје, како и со Грција. До 2028-2029 година се очекува да се изгради автопат или експресен пат, модерен, брз и безбеден, по кој патувањето ќе трае околу еден час и половина. Ова значително ќе ја подобри бизнис климата во Битола и ќе ја смени динамиката на целиот регион“, рече Николоски.
Министерот се осврна и на проекти во Штип, каде се работи на урбанизација во делот на бањата Кежовица и изградба на вештачко туристичко езеро со цел да се подобри туристичката понуда на градот.
„Во Штип многу се вложува во туризмот. Заедно со градоначалникот работиме на урбанизација на бањата Кежовица и на изградба на првото вештачко туристичко езеро над Штип. Овие проекти имаат голем потенцијал за развој на туризмот и целокупното привлекување на посетители“, објасни Николоски.
Според него, овие инфраструктурни и туристички проекти се дел од стратегијата за унапредување на регионалниот развој и подобрување на економските и туристичките услови во Македонија.
