„НЕРАБОТНИЦИ“ ОД ЦЕЛИОТ СВЕТ, ПРИЈАВЕТЕ СЕ – изборот е во Хрватска, а еве кои се условите за да победите
Се бара „Неработник на годината“. Потрагата ја почна хрватската платформа за вработување „Пикџобс“, но нивната цел, се чини, е малку поинаква од првиот впечаток.
„Ова е невообичаена можност за сите вработени, самовработени, студенти и невработени – да му покажат на светот како успеале во она што многу луѓе го сметаат за невозможно: Постигнување рамнотежа меѓу приватниот и деловниот живот. Бараме личност со успешна приказна за тоа како го намалила обемот на работа и ја зголемила или одржала својата продуктивност. Со други зборови, личност која работела попаметно во 2024 година, а не понапорно. Бараме личност која постигнала успех во 2024 година благодарение на стратегии за делегирање, автоматизација, квалитетно управување со времето или кој било друг начин што овозможува рамнотежа на приватниот и деловниот живот“, се наведува во објавата.
Конкурсот е отворен за сите – студенти, вработени на неопределено време, хонорарци итн. И не е ограничен само на Хрватска, туку може да се пријават „неработници“ од целиот свет. Може да се пријавите себеси или некој друг со кратка приказна или видео во коешто се објаснува „како лицето го намалило времето минато на работа“, а станало попродуктивно.
„Ова е со цел да се подигне свеста за спомнатите проблеми и да поттикнат позитивни промени во работната култура. Целта е да се мотивираат луѓето да истражуваат начини да се најде рамнотежа меѓу приватниот и деловниот живот, но и да се поттикнат работните заедници да воведат пофлексибилни практики коишто би ги поттикнале вработените да ја најдат таа рамнотежа“, се додава во објаснувањето за конкурсот.
Добитникот на титулата „Неработник на годината“ ќе добие парична награда од 1.000 евра.
