Неподвижен кумановец со денови лежи на отворено во Куманово, никој не го згрижува оти нема документи!
56-годишниот кумановец Сефедин К. со денови лежи неподвижен на земја пред својата распадната куќа на улицата Осогово во Куманово, јавува СДК.МК.
Тој има проблеми со нозете и не може да се движи за да отиде на лекар, а надлежните си ја префрлаат вината кој треба да му помогне.
Според порталот, Сефедин нема државјанство и не е регистиран во системот за помош во Центарот за социјални работи.
Соседите во изјава за порталот велат Сафедин има сериозни здравствени проблеми и треба да се смести во институција.
„Човекот три дена лежеше на улица, а сега е во дворот. Не може да оди само се влече со нозете. Лежи на мокро и дење и ноќе, сега е и мокар од дождот. Секој ден вртиме во полиција, во брза помош, во Општината, кај социјалните служби и никој не доаѓа. Сите се прогласија за ненадлежни. Сите имаат изговори. Од брза помош еднаш го однесоа и го вратија, викаат не сакале да го примат во болница и повеќе не доѓаат. Од полиција велат тоа не е нивна работа, од Општина немале ингеренции, од Социјалното немале каде да го сместат. Ова е тажно да нема кој да помогне. Како одминува времето тој е во сè полоша состојба. Запуштен е и дополнително се извалка седејќи на едно место. Ние му даваме храна, ама тој има потреба од лекарства. Треба да се однесе во болница, да се лекува“, вели за СДК.МК соседот Арбен Реџепи.
Дека Сефедин се наоѓа во исклучително тешка состојба, се увериле и од СДК.мк кои го посетиле, а во краткиот разговор прво им побарал маст за нозете затоа што целите му се во рани и многу го болеле.
Извор/ФОТО: СДК.МК
