„Немаме бекап систем, ако се изгасне главниот, би останале со црн екран“, вели контролор на летање во М-НАВ
Зголемувањето од 12% на бројот на прелети во првата половина од годината е постигнато и покрај строгите рестрикции наметнати поради застарената опрема, вели Александар Тасевски, претседател на Синдикатот на контролори на летање во интервју за Радио Слободна Европа. Според него, без овие ограничувања, сообраќајот би можел да порасне за 50%, што би значело значително повеќе приходи за М-НАВ, наместо тие пари да завршуваат во соседни земји кои имаат капацитет да ги прифатат летовите.
Тасевски нагласува дека нови авиолинии и раст на побарувачката се реалност, но дека за нивно опслужување потребни се повеќе контролори на летање. Тој тврди дека отворањето на такви работни места е можно, како што се отвораат и други непотребни позиции, но дека раководството ја користи аргументацијата за новиот систем и постојната зграда како изговор.
„И со сегашната опрема, ако техничките ограничувања ги немавме, со три сектора би можеле да опслужиме 90 авиони на час, наместо 72. Со четврти сектор и нова опрема – дури 120“, вели Тасевски.
Тој предупредува дека постојната опрема не е директно опасна додека работи, но ризикот е во нејзината старост и недостигот од резервни делови. За разлика од европските контролни центри, М-НАВ нема бекап-систем кој би презел работа во случај на дефект.
„Ние тој бекап го немаме. Така што, во случај кога нас би ни се изгасил системот, ние би останале со црн екран“, предупредува тој.
Покрај техничките проблеми, Тасевски посочува и на нарушени меѓучовечки односи и контроверзии околу новите вработувања. Според него, проблемот не е само во платите, туку и во фактот што одредени работни места нудат „комоција“ – примање плата без ефективно извршување на задачите. Со заминувањето на искусните кадри се губи квалитетот на услугата, особено во помошните служби, што дополнително го отежнува работењето на контролорите.
