Некои граѓани сè уште без поврат на ДДВ од „МојДДВ“ за првиот квартал – проблемот често е во трансакциските сметки
Иако исплатите за поврат на ДДВ преку апликацијата „МојДДВ“ за првиот квартал од 2025 година започнаа на 19 мај, дел од граѓаните сè уште немаат добиено средства на своите трансакциски сметки. Од Управата за јавни приходи (УЈП) појаснуваат дека исплатите се вршат секојдневно, според редоследот на обработените налози.
Досега, заклучно со 22 мај, исплатени се 175,3 милиони денари (околу 2,85 милиони евра) на 112.000 корисници, додека целокупната сума која ќе биде распределена за ова тримесечје изнесува 790,5 милиони денари (приближно 12,5 милиони евра) за 496.531 корисници.
Од УЈП информираат дека дел од исплатите се одложени поради погрешно наведени трансакциски сметки. Според евиденцијата, 4.724 граѓани имаат внесено неточни податоци, што го оневозможува преносот на средствата. Институцијата апелира до граѓаните да ги проверат и, доколку е потребно, да ги ажурираат податоците директно преку апликацијата, за да може да се изврши исплатата.
Преку „МојДДВ“, граѓаните добиваат поврат на 15 отсто од платениот ДДВ, со максимален износ од 2.100 денари по квартал. Апликацијата, која е дел од проектот „МојДДВ – Моја награда“ започнат во 2019 година, има за цел да го зголеми даночното пријавување, да ја намали сивата економија и да ја поттикне фискалната дисциплина.
