Најтешката година заврши со најслатка убедлива победа – Вардар се врати во Прва лига! (ФОТО)
Иако цела полусезона играа без пари, оставени сами на себе и единствено со поддршка од навивачите Комити, вардаровите фудбалери го одиграа најдобриот меч кога беше најпотребно. Во баражот за Прва лига, како најважен меч на оваа генерација која играше за своја чест, гордост и од инает кога сите се обидуваа да му одмогнат на најголемиот македонски клуб, носени од фанатичните Комити, одиграа шампионски. Како во времињата кога Вардар доминираше во македонскиот фудбал. Од прва до последна минута, па Скопје треба да биде и среќен што мечот го загуби вака, а не со тотална катастрофа.
Дарко Размоски со два гола и Дарко Глишиќ со еден за еден час игра ја обезбедија победата, но буквално сите од голманот Филип Гачевски до центарфорот Дарио Десниќ денеска ги заслужуваат сите аплаузи за начинот како одиграа, за сега енергија, агресивност и пожртвуваност.
А, сѐ почна експресно по три минути откако размоски од непосредна близина погоди за водство за ерупција кај Комити, за да продолжи со низа извонредни шанси, две на Размоски, една на Ненад Мишковски, една на Филип Јаневски, кои ги одбрани Андреа Ефемов, а дека сѐ е отворено за кам-бекот во Прва лига се погрижи Миле Тодоров со глупоста на годината, откако факел на теренот го фрли на трибината на вардаровите навивачи и доби црвен картон.
Кусокот на еден фудбалер, Вардар го искористи во првата третина од вториот дел, пет минути по рестартот Размоски го дуплираше водството, а печат на веќе сигурната победа стави Глишиќ со голот на неполн час од мечот. И сѐ потоа беше јасно дека тешко Скопје ќе може да се приближи за да го донесе мечот во неизвесност, а неколку контри можеа да донесат уште поубедлива победа.
Вардар на теренот го обезбеди враќањето во Прва лига, но битките за враќањето на Вардар на старата слава продолжуваат, зашто сега следува и поголемата за решавање на финансиските проблеми и блокираната сметка, со реструктуирање на клубот, со најавената поддршка од неколку скопски општини како вовед дека се гледа крајот на агонијата низ која поминуваше најголемиот македонски бренд од 2020 година наваму кога почна и пропаста со испаѓањето во Втората лига.
