НА ПЛАЖА ВО ГРЦИЈА: Србин спаси девојче од Македонија
Саша Костиќ од Србија го спаси животот на четири годишно девојче од Македонија во Грција.
Како се чувствувал во тој момент, што му поминувало низ главата, открива самиот херој на оваа приказна.
„Местото е Неа Врасна во Грција. Бев во плиткото море со мојот син, кога во еден момент видов како родителите изнесуваат девојче од околу четири години, во несвест. Веднаш видов дека е нешто сериозно, отидов до него. Мојата колешка, која е исто така докторка од Клиниката за инфективни болести, д-р Душка Стојановиќ, ми дојде на помош. Видовме дека детето е во сериозна животна ситуација, нè делеа секунди. Веднаш почнавме со реанимација. Забележавме дека мускулите на вилицата ѝ се во грч, помисливме дека има напад или нешто слично и веднаш почнавме со реанимација. Траеше околу две добри минути. Успеавме да ги отвориме дишните патишта, да воспоставиме отчукувања на срцето“, вели Саша.
Кажа дека потоа пристигнала екипа спасувачи кои биле во близина.
„Ни ја донесоа целата потребна дополнителна опрема за да се спречат сите компликации што се јавуваат при давење. Спречивме појава на хипотермија, како и одржување на кислород во белите дробови. За околу пет минути пристигна и итната медицинска помош. Девојчето веќе беше свесно, дишеше, ја држевме будна, разговаравме со неа цело време, така што итно беше пренесена во најблиската болница каде што ја доби целата можна потребна нега“, додаде тој.
Девојчето е задржано во болница.
Родителите на малата Ирина се бескрајно благодарни за помошта што го спаси животот на нивното дете, кое сега е стабилно и ќе биде отпуштено од болница за неколку дена, објави Телеграф.
