НА 1 МАЈ ЌЕ ИМА ПРОТЕСТ: ССМ не се откажува од барањето за минимална плата од 500 евра
Сојузот на синдикати на Македонија(ССМ) најави протест за 1 Мај – Меѓународниот ден на трудот.
„Сведоци сме дека денеска, за креаторите на политиките е најважно да ги зачуваат нивните енормно покачените плати сега веќе за 79 отсто, а од друга страна, дел од работниците во јавниот сектор не добија усогласување на нивните плати со порастот на просечната плата согласно Општиот колективен договор за јавниот сектор, не го прифатија барањето на ССМ за зголемување на минималната плата за дополнителни 6.000 денари со зголемување и на останатите плати за истата вредност. Денеска, работниците во Македонија се соочуваат со се поголем притисок за нивната егзистенција поради високите трошоци за живот и ниските плати. Денес, сите Ние, сите Вие, имаме и имате можност и шанса да покажеме дека тие кои ја водат Државата треба да го слушнат гласот на работниците, имаме можност да го покажеме работничкото незадоволство и заедно да излеземе на голем работнички протест на 1 Мај, на кој ќе ги упатиме пораките, нашите и работничките барања. На 1 Мај, протестот ќе започне во 11 часот од пред Работничкиот дом со движење, Собрание – Стопанска комора – Влада. На протестот очекуваме да се придружат сите кои ја поддржуваат работничката борба за достоинствени плати и пристојни услови за работа. ССМ упатува повик до сите, до работниците, заедно да излеземе на работнички протест на 1 Мај – Меѓународниот ден на трудот и заедно да побараме зголемување на минималната плата на 500 евра, зголемување на останатите плати за 100 евра, зголемување на платите на вработените во јавниот сектор за 12,6 отсто согласно Општиот колективен договор за јавниот сектор“, се вели во соопштението.
Минималецот се покачи за 1.812 денари. ССМ и претходно организираше протести за да изрази револт поради тоа што минималната плата не се зголеми на 500 евра.
