МВР СО МЕСЕЧЕН БИЛАНС: 121 возач уапсен за „безобзирно возење“, 94 од нив возеле пијани
Министерството за внатрешни работи денеска излезе со детален статистички преглед на сообраќајните контроли спроведени во текот на октомври (01.10.2025-31.10.2025). Како резултат на редовните контроли на патиштата низ земјава, издадени се вкупно 16.801 платни налози.
Најчест прекршок и овој месец останува брзото возење. Од вкупниот број казни, дури 4.821 се однесуваат на возачи кои не ја почитувале пропишаната брзина на движење.
Она што е особено загрижувачко е бројот на лица кои се лишени од слобода за кривично дело „Безобзирно управување на возило“ (член 297-а од КЗ). Во октомври биле уапсени вкупно 121 лице, од кои:
94 за возење под дејство на алкохол
15 за возење со брзина поголема од дозволената во населено место
8 за возење со брзина поголема од дозволената надвор од населено место
4 поради возење под дејство на дрога и психотропни супстанци
Според статистичкиот преглед, во текот на октомври биле евидентирани и 4.165 прекршоци за неправилно паркирање. Дури 1.888 мерки се изречени за возачи што управувале возило без возачка дозвола, а изречени се и 373 санкции за возење под дејство на алкохол (кои не спаѓаат во кривичното дело).
Контролите ги опфатиле и останатите учесници во сообраќајот. Санкционирани биле 111 возачи на мотоцикли бидејќи не носеле заштитен шлем (кацига), 232 пешаци кои не ги почитувале правилата и 63 возачи на електрични тротинети. Санкционирани се и 942 учесници во сообраќајот кои не користеле сигурносен појас.
Од сообраќај биле отстранети вкупно 656 возила – 480 од нив биле нерегистрирани, а 176 биле технички неисправни.
Полицијата казнила и 145 возачи поради неисполнување на пропишаните услови за затемнување на стаклата (фолии) и еден возач поради неовластено вградување и користење на уреди за давање на посебни светлосни и звучни знаци (флешери).
„Сообраќајните контроли продолжуваат и во наредните денови. Апелираме до сите учесници во сообраќајот да ги почитуваме сообраќајните правила и прописи и заеднички да придонесеме за побезбедни патишта“, соопшти МВР.
