Муцунски: Средствата за одбрана се инвестиција во безбедност, економија и иднината
Зголемувањето на буџетот за одбрана до 5 проценти од БДП не е насочено само кон класични воени набавки, туку претставува стратешка инвестиција во безбедноста, економијата и инфраструктурата на државата. Ова денеска го изјави министерот за надворешни работи Тимчо Муцунски.
– Одиме кон пет проценти за да не бидеме во ситуација некогаш да мораме да трошиме 30 или 40 проценти од БДП, како што трошат држави кои се соочуваат со конфликти на своја територија – порача Муцунски.
Средствата ќе бидат наменети не само за модернизација на армијата, туку и за развој на сајбер безбедноста, инфраструктурата, нато-коридорите и поддршка на иновации и стартап компании со стратешко значење за националната безбедност.
На прес-конференцијата, на која беше презентиран извештајот за сработеното во првата година од мандатот на Владата, министерот потенцира дека оваа политика е усогласена со стандардите и одлуките на НАТО, донесени со консензус од сите земји членки.
– Ова не е одлука само на нашата Влада. Сите членки на Алијансата ја поддржуваат стратегијата за зголемување на трошоците за одбрана, но со проширен фокус кој вклучува и економска и технолошка безбедност – истакна Муцунски.
Тој објасни дека освен воена модернизација, средствата ќе се вложуваат и во критична инфраструктура со стратешко значење за државата, како и во зајакнување на индустриската база преку производство на наменска опрема и поддршка на нови технологии.
– Тоа значи повеќе сигурност, но и нови работни места, посилна економија и одржлива развојна база. Ова се историски, генерациски одлуки кои ќе останат релевантни и за идните влади – заклучи Муцунски, додавајќи дека целта е долгорочна стабилност и заштита под НАТО-чадорот.
