Митовски: Случајот со возилото е измислен, МВР се користи за политички притисок
Градоначалникот на Крива Паланка, Сашко Митовски, ги отфрли како шпекулации наводите за негова вмешаност во инцидент во полициската станица и упати сериозни обвинувања за организиран политички притисок врз него и општинската администрација. Во емисијата на 4ТВ, тој истакна дека МВР се обидува да покаже „апсолутна политичка моќ“ преку серија незаконски постапки.
Митовски ги демантираше пишувањата на одредени медиуми дека насилна отстранувал пломби од возило во сопственост на неговиот брат. Тој потенцира дека поминале повеќе од два месеци од настанот (кој се случил во март), а сè уште нема официјална пријава, што според него е јасен доказ за тенденциозноста на случајот.
„Возилото е одземено целосно спротивно на законите – додека било паркирано, а не во движење. За таа намена е ангажирана пајак-служба од соседен град без никаков договор за меѓуопштинска соработка. Ова е класично сценарио за нарушување на мојот личен углед“, вели Митовски.
Покрај личните напади, градоначалникот алармира за невидена институционална опструкција врз работата на локалната самоуправа. Тој откри дека од почетокот на годинава до денес, МВР испратило повеќе од 80 активни барања за документација до Општина Крива Паланка.
Според него, криминалистичката полиција отвора предмети за буквално секоја тендерска постапка или проект кој се спроведува во градот.
„На шала велам дека ќе треба да вработиме посебно лице во општината кое ќе работи само на предметите што ни ги праќа МВР. Се бараат тендерски документации, проекти, записници… Целта е по секоја цена да се изнајде нешто за да се нападне мојата позиција“, истакна градоначалникот.
Митовски е дециден дека зад овие постапки стојат политички центри кои сакаат да го вратат времето на полициска репресија. Тој изрази жал што чесните луѓе во општинската администрација, кои го посветиле животот на развојот на градот, сега се изложени на постојан притисок и проверки.
„Крива Паланка е мал град и сите знаеме од каде доаѓаат овие наредби. Наместо да бидат сервис на граѓаните, одредени структури во МВР се обидуваат да бидат фактор во политичката борба“, заклучи Митовски.
