Митева: Владата покажува политичка волја за независно обвинителство
Портпаролката на Владата, Марија Митева вечерва во емисијата Ноќно Студио на 4ТВ изјави дека состојбите во правосудството се резултат на долгогодишни слабости и посочи дека јавноста во изминатиот период сведочи на сериозни случаи, меѓу кои и, како што рече, криминалот со мазут вреден над 160 милиони евра.
Таа оцени дека довербата во правосудниот систем е на многу ниско ниво, но нагласи дека Владата започнала процес на промени, особено преку изборот на новиот државен јавен обвинител.
Според Митева, изборот поминал без контроверзии и без забелешки за политичка поврзаност, а позитивни реакции дошле и од самата правосудна фела.
– Тоа е клучен показател за начинот на кој Владата е подготвена да ги води процесите и да покаже вистинска политичка волја за независност во работењето на Јавното обвинителство – изјави Митева.
Таа додаде дека останува времето да покаже дали новиот јавен обвинител ќе ја оправда довербата што му е дадена.
