Министерство за финансии објасни каде „заглави“ издавањето на еврообврзницата
По забелешките од јавноста, Министерството за финансии објаснува дека продолжувањето на постапката за издавање на еврообврзницата, како што соопштиле и вчера, се должи на внатрешна постапка, која бара и мислење на министерот за правда.
Додаваат дека на 13 февруари 4-ца министри поднесоа оставки до Собранието, меѓу кои и министерот за правда, соодветно нема вршител на должноста во моментот.
„Агентите и инвеститорите беа навремено известени за административната пречка во процедурата, исто како и дека издавањето на еврообврзницата (аукција) ќе биде завршено веднаш штом биде назначен нов министер за правда од страна на Собранието, за што изразуваме верување дека политичките чинители ќе го имаат предвид и нема да се оддолжува процесот. Средствата од деветтата еврообврзница се наменети за рефинансирање на еврообврзницата издадена во 2016 година, која доспева во јули годинава. Накусо за процедурата за издавање на еврообврзница. Еврообврзницата е државна обврзница деноминирана во евра, која државата ја издава на меѓународен пазар на капитал, преку овластени агенти-банки на инвеститори (банки, фондови). Како и државните обврзници на домашен пазар, еврообврзницата се продава на аукција, по што се врши запишување на истата од страна на инвеститорите, на нивно име. По ова инвеститорите на годишна основа добиваат отплата на купонската камата или пак ја тргуваат/препродаваат еврообврзницата на секундарниот пазар. Поради запазување на интерната постапка, процедурата за издавање на еврообврзница во земјава (обезбедување на мислење и од страна на министерот за правда, функција која во моментот нема врштител), инвеститорите ја немаат запишано еврообврзницата – следствено не можеле да тргуваат со неа на секундарниот пазар, како што се појавија одредени тврдења. Следствено, неточни се и тврдењата за барање отштета и пенали“, велат од Министерството за финансии.
На пазарите на капитал тековно нема промени од аспект на каматите на пазарот, но не шпекулираат со очекувања за каматната стапка бидејќи тоа се пазарно чуствителни информации.
„Ќе истакнеме само дека довербата на инвеститорите во економските политики на Владата е силна, што се огледа од нивната побарувачка за еврообврзницата која беше за 2,5 пати повисока од понудата на аукцијата која беше одржана. Имено, ние понудивме 600 милиони евра, тие сакаа да запишат милијарда и петстотини милиони евра, но останавме на понудената сума од 600 милиони евра“, додаваат од Министерството за финансии.
Во однос на шпекулациите за намалување на кредитниот рејтинг, тие се целосно неточни, бидејќи кредитниот рејтинг е комплексна оценка на низа макроекономски и политички критериуми, a најдобар доказ за мислењето на инвеститорите е побарувачката која беше исклучително висока.
ВМРО-ДПМНЕ обвини дека ќе падне кредитниот рејтинг на Македонија. За нив ова е невиден преседан.
