Мицкоски загрижен поради можен амандман во ЕП: Се работи за негирање на македонскиот народ

Премиерот Христијан Мицкоски изрази загриженост пред објавувањето на извештајот за Македонија во Европскиот парламент идната недела, особено поради најавата дека европратеник ќе поднесе амандман со кој, како што рече, се негира посебноста на македонскиот народ.

Тој откри дека во изминатите месеци соработувале со известувачот за Македонија, Томас Вајц, со цел во текстот јасно да биде нагласена посебноста на македонскиот јазик и идентитет.

Во однос на најновата резолуција усвоена од бугарскиот парламент, со која Софија повторно инсистира Македонија да ги исполни условите од преговарачката рамка, вклучително и внесувањето на Бугарите во Уставот, Мицкоски оцени дека нема потреба од нова резолуција во македонското Собрание.

– Македонија бара гаранции од Европската Унија дека ова се последните билатерални условувања од Бугарија. Прифатливо е само решение со уставни измени со одложено дејство – изјави Мицкоски.

Ставот на официјална Софија, повторен преку последната резолуција, е дека не се прифаќаат обиди за повторно преговарање, заобиколување или игнорирање на веќе постигнатите договори.