Мицкоски со јасно барање до новиот државен јавен обвинител: Прво да се извадат сите предмети од фиоките
Премиерот Христијан Мицкоски денеска ги соопшти своите очекувања од новиот државен јавен обвинител, порачувајќи дека клучниот приоритет мора да биде расчистување со селективната правда и нерешените предмети кои со години стојат во застој.
Премиерот беше дециден дека првиот чекор на новиот обвинител треба да биде ревизија на сите документи и случаи кои досега биле намерно чувани во тајност или не биле процесирани.
„Прво што треба да направи е сите оние документи и случаи коишто се држеа во фиока да ги извади и да ги истражи. Таму каде што нема дело и докази да ги затвори, а таму каде што има дело и докази — да оформи случај и да го предаде до судот“, изјави Мицкоски.
Мицкоски нагласи дека улогата на јавниот обвинител е да биде филтер низ кој ќе поминуваат само аргументирани случаи, оставајќи му на судот да ја донесе финалната одлука за отпочнување на судските постапки. Според него, јавноста очекува институцијата да престане да биде инструмент за кочење на правдата.
„Очекувам да биде заштитник на правото, да биде генератор на правдина и тоа е она што го очекувам од новиот јавен државен обвинител“, заклучи премиерот.
Со оваа изјава, Мицкоски упати директна порака дека извршната власт очекува енергична борба против криминалот и корупцијата, каде професионализмот ќе биде единствениот критериум за работата на Обвинителството.
