Мицкоски: Пуштен во употреба затворениот базен во Кисела Вода – тоа се средства на граѓаните и мора да бидат ставени во функција!
Во Основното училиште „Невена Георгиева-Дуња“ во Општина Кисела Вода денеска свечено беше пуштен во употреба нов затворен базен, изграден како дел од програмата за подобрување на спортската инфраструктура во образовните установи. На настанот присуствуваше и премиерот Христијан Мицкоски, кој истакна дека ваквите проекти се важни не само за учениците, туку и за целата заедница.
„Немам што многу да додадам по сè што веќе кажаа министерот, изведувачот на работите и градоначалникот на Кисела Вода. Сакам само да посакам дечињата од ова училиште, но и сите основци од општината, долго и со радост да го користат овој базен,“ рече Мицкоски.
Тој нагласи дека државата има обврска да ги довршува започнатите проекти, без разлика во кое време биле започнати.
„Многу е важно сè што е започнато – да се заврши. Не смееме да оставаме недовршени објекти како споменици на едно време, без разлика дали тоа ни се допаѓало или не. Тоа се средства на граѓаните и мора да бидат ставени во функција, за да им служат на граѓаните,“ истакна премиерот.
Во својата изјава, Мицкоски најави дека до крајот на летото ќе бидат пуштени во употреба уште четири вакви базени, кои се градат од истиот изведувач.
„Остануваме Влада насочена кон реализација на проекти, реформи и визија за иднината,“ порача тој, додавајќи: „Нека е со среќа уште еднаш.“
