Мицкоски: Претседателот на ССМ и опозицијата „напаѓаат“ координирано за минималната плата
Премиерот Христијан Мицкоски, денес како одговор на прашање дали ќе се зголеми минималната плата на 450 евра, рече дека претседателот на Сојузот на синдикати на Македонија, Слободан Трендафилов, заедно со опозицијата координирано вршеле притисок по ова прашање.
Тој додаде дека „истиот тој синдикат“ бил од страна на тогашната министерка за труд и социјала политика Јованка Тренчевска и дека тука „има многу политика, а малку основа за барање на правата на работниците“.
„Ја слушав изјавата на претседателот на синдикатот, можам да кажам дека од Министерството за финансии и од министерката бев информиран дека се е постапено согласно закон, во ребалансот и тука не треба да имаме никаква дилема. Мене ме зачуди фактот што веднаш претседателот на СДСМ, како да беа чудно синхронизирани, излезе со свој став во поддршка на овој претседател. Нема да навлегувам во начинот како беше избран итн. за тоа има институции, јавноста ја повикувам многу внимателно да го следи овој случај, но за помалку од 2 месеци од работа на една Влада гледам еден синхронизиран, би рекол напад спротивен и на закони и на етика и на принцип и на сѐ од страна на претседател на Сојуз на синдикати и претседател на најголема опозициска партија, и тоа мене ме доведува во ситуација да размислувам дека тука има политичка позадина“, изјави Мицкоски.
Премиерот повика да не се наседнува на политички кампањи и дека Владата ќе разговара со сите легитимни синдикални организации, бидејќи јасна е потребата од зголемување на платите.
„Јас ги повикувам членовите на синдикалната организација да не наседнуваат на политички кампањи во рамките на истата, ние сме Влада којашто многу скоро од денеска ќе седне и ќе разговара со сите легитимни синдикални организации. Тука немаме никаков проблем, сакаме да помогнеме, јас ја разбирам потребата од зголемување на платите“, истакна Мицкоски.
