Мицкоски на средба со Гренел: САД би можел да инвестира во „Чебрен“
Премиерот Христијан Мицкоски по денешната средба со поранешниот директор за национално разузнавање на САД, Ричард Гренел, објави дека проектот „Чебрен“ во иднина може да има американски партнер.
На почетокот на годинава пропадна 14-иот тендер за изградба на најголемиот хидроенергетски проект на Црна Река, откако грчката фирма „Архиродон“ не стави потпис на договорот со Министерството за животна средина.„Архиродон“ требаше да ја изгради хидроцентралата, а добивката да ја дели заедно со ЕСМ.
„Ги анализиравме можностите за искористување на потенцијалите за идни заеднички инвестиции во проекти значајни за регионот. Во наведениот контекст беше разгледана можноста за евентуално американско учество во енергетскиот проект „Чебрен“, кој има стратешко значење за енергетската независност на земјата“, напиша Мицкоски на социјалните мрежи.
На средбата присуствувал и министерот за надворешни работи Тимчо Муцунски, а акцент на средбата бил ставен на „можностите за дополнително зајакнување на односите со САД“.
