Мицкоски: Капиталните инвестиции ќе бидат главен двигател на економијата во 2026 година

Премиерот Христијан Мицкоски на денешната седница во Собранието посочи дека за следната година главен приоритет на Владата ќе бидат капиталните инвестиции, кои се очекува да бидат мотор на економскиот раст, како што тоа беше случај и оваа година.

Според Мицкоски, економијата бележи раст од 3,4% од БДП, а во третиот квартал се очекува уште повисок раст, со оглед на тоа што во градежништвото реализацијата на инвестициите е зголемена за над 34% и кај капиталните и кај приватните инвестиции.

„Нашата цел е да оствариме реален раст на БДП од 4% и повеќе, и номинален раст помеѓу 7,5% и 8%. Тоа веќе го правиме – во првиот квартал беше 7,5%, во вториот 7,8%“, истакна премиерот, додавајќи дека Владата исто така работи на намалување на јавниот и државниот долг.

Мицкоски нагласи дека односот на задолжувања во споредба со додадената вредност во економијата е позитивен, со што, како што посочи, Владата создава двојно повеќе вредност отколку што се задолжува државата. Тој посочи дека политиките на сегашната влада се фокусираат на одговорно управување со јавните финансии и капитални инвестиции, за граѓаните да почувствуваат конкретни резултати.

„Главната цел е да се реализираат капиталните инвестиции во сите општини, а вкупниот обем на овие проекти, вклучувајќи ги и програмите преку министерствата, достигнува околу половина милијарда евра. Дел од проектите се завршени, дел се во тек, и очекуваме 75 до 80% да бидат реализирани“, изјави премиерот.

Мицкоски посебно ја спомена завршната фаза на автопатот Кичево-Охрид, напредокот на коридорите 8 и 10д и очекувањата за започнување нови капитални проекти во следниот период.

„Жестоко работиме на реализацијата на капиталните проекти и очекувам значителен напредок во сите сегменти“, додаде Мицкоски.