Мицкоски: Царинската стапка со САД ќе биде 0%

Вечерва пред почетокот на Свечената академија по повод 23 Мај – Националниот ден на Власите, во Македонскиот народен театар, премиерот Христијан Мицкоски изјави дека половина од царинските тарифи ќе бидат нивелирани и намалени од 1 јули, а останатите 50 отсто ќе се укинат на 1 јануари 2026 година. Мерката е дел од економските реформи кои, според него, биле барање на бизнис заедницата што со децении не било усогласено.

– Тоа се парафискални давачки кои имаат цел да го зајакнат домашното производство и да им помогнат на извозно ориентираните компании. Со ова се врши и усогласување со европските стандарди – изјави Мицкоски.

Мицкоски во однос на изјавата на претседателот на САД, Донал Трамп, дека ќе воведе 50% царина за производи од Европската Унија, рече дека Македонија нема да биде погодена од тие мерки, бидејќи се работи на воведување нулта царинска стапка за американски производи.

– Нашата царинска стапка со САД е 10%, а со новото усогласување таа ќе биде 0%. Веќе сум во сериозни разговори со американската администрација и со државниот секретар за економија Хауард Лутник. Очекувам да бидеме меѓу земјите со најниски царински стапки, додаде премиерот.