Метео аларм за Македонија: Се очекуваат пообилни врнежи (над 30 л/м²), грмежи и засилен северен ветер

Времето денеска (09.11.2025) е променливо облачно со повремени локални врнежи од дожд, кои ќе бидат поизразени особено кон крајот на денот и во текот на ноќта. Ќе дува слаб до умерен ветер од јужен правец, а максималната температура ќе биде во интервал од 14 до 20 степени.

Во Скопје, времето е променливо облачно, а попладне и во текот на ноќта ќе има повремен дожд. Ќе дува слаб до умерен јужен ветер, а максималната температура ќе достигне 18 степени.

Управата за хидрометеоролошки работи (УХМР) најавува дека утре (10.11.2025) времето ќе биде претежно облачно со повремени врнежи од дожд.

Наместа врнежите ќе бидат поројни и пообилни, со очекуван наврнат воден талог од над 30 литри на метар квадратен за 24 часа. Локално ќе има и услови за појава на грмежи.

Локални врнежи ќе има и во вторник (11.11) во претпладневните часови. Со врнежите ќе започне да дува умерен, а вдолж Повардарието и засилен северен ветер.

Од УХМР информираат дека потоа, до крајот на неделата, времето ќе биде стабилно и суво. Оваа стабилизација ќе донесе и значително пониски утрински температури.

Според прогнозата, во среда минималните температури ќе се движат од 1 до 8 степени, а во четврток и петок наутро ќе паднат и под нулата, со прогнозирани температури од -1 до 6, односно -2 до 6 степени.