Медицинските сестри од Тетово го ставаат протестот во мирување, но не се откажуваат од барањата

Медицинските сестри од Тетово решија да го стават својот протест во мирување, разочарани од слаба поддршка од јавноста и институциите. Тие најавуваат дека ќе почекаат назначување на нов министер за здравство, со надеж дека конечно ќе се најде решение за нивните долгогодишни проблеми.

„Нашите протести беа тивки и со многу жртви. Не се работи за конкретен директор – оваа состојба се повторува со години при секоја промена на раководството,“ изјави главната медицинска сестра Лидија Коруновски. Таа додаде дека и покрај посветеноста, особено за време на пандемијата, не добиле признание или подобри услови.

Коруновски истакна дека решението не е во тишината, туку во институционалниот дијалог: „Одлучивме да се повлечеме достоинствено, но нема да престанеме да ги бараме нашите права. Ќе продолжиме да чекаме одговор од болницата, Министерството за здравство и Министерството за финансии.“

Иако протестот е во мирување, сестрите нагласуваат дека нивната борба за вработувања и достоинствени услови не е завршена.