Меџити до Таравари: Ти се враќаш кон црната листа, ја предаде Владата!
По излегувањето на Алијансата на Албанците од владината коалиција, лидерот на Демократското движење и еден од лидерите на коалицијата „ВРЕДИ“, Изет Меџити, реагираше преку објава на „Фејсбук“, каде истакна дека Влен продолжува по патот на промената.
Меџити во објавата порача дека Арбен Таравари не ја напуштил Владата, туку ја предал.
– Ти не донесе промена. Ти не се враќаш кон народот. Ти се враќаш кон црната листа. Ти не ја напушташ Владата. Ти ја предаде Владата, напиша Меџити.
Тој вели дека „Таравари е разочарување за секој Албанец кој гласал за промената“.
– ВРЕДИ продолжува по патот на промената. Ги покануваме сите активисти, симпатизери и гласачи кои се чувствуваат измамени, предадени и оставени сред пат без насока, пишува во објавата.
Лидерот на едното крило на Алијанса за Албанците Арбен Таравари синоќа по состанокот одржан во Тетово соопшти дека ја напуштаат владината коалиција и одат во опозиција.
– Констатиравме дека минатата година со гордост ја донесовме промената во албанскиот блок после 20 години. Меѓутоа, меѓутоа промените што ги видовме за жал не ги испорачавме и тоа се секојдневно граѓаните не критикуваат. Затоа ние одлучивме, да се вратиме кај граѓаните. Да побараме од нив доверба во октомври за локалните избори. Кога со „Вреди“ се обидувавме околу шест недели и ако имаме сопствени советнички листи да изнајдеме начин за меѓусебна поддршка за кандидатите за градоначалници, меѓутоа, не успеавме во тоа и денес констатираме дека доколку има недоверба во тие што се членови на владата, доколку има конспирации и секакви сомнежи немаме што да бараме таму, рече Таравари.
