Марта Кос најави посредување во спорот меѓу Македонија и Бугарија за укинување на пречките за евроинтеграција

Еврокомесарката за проширување, Марта Кос, истакна дека е подготвена да посредува меѓу Северна Македонија и Бугарија за решавање на билатералното прашање што го блокира стартот на преговорите по Кластерот „Основни вредности“. Ова го изјави во дебатата пред Комитетот за надворешни работи на Европскиот парламент, посветена на проширувањето на ЕУ, состојбите во Украина и соседската политика.

„Наша политичка цел е да ги започнеме преговорите со Северна Македонија веднаш по усвојувањето на потребните уставни измени. Бугарија и Северна Македонија треба да разговараат интензивно и да најдат решение, а јас сум на располагање како олеснувач ако е потребно“, рече Кос.

Таа нагласи дека проширувањето е повеќе од проширување – тоа е обединување на Европа.

Известувачот на Европскиот парламент за Северна Македонија, Томас Вајц, потенцираше дека уставните измени мора да се спроведат и ја подвлече долготрајната посветеност на земјата кон реформите и усогласувањето со европското законодавство.

Од бугарската страна, европратениците Станислав Стојанов од „Преродба“ и Андреј Ковачев од ГЕРБ ја критикуваа употребата на терминот „билатерално прашање“, инсистирајќи дека тоа е прашање помеѓу кандидатската земја и ЕУ. Ковачев изјави дека „градјаните на Северна Македонија загубија многу време бидејќи не се исполнети заклучоците на Советот од 2022 година“.

Кос рече дека е важно да се водат разговори помеѓу двете земји за да се постигне помирување и добрососедски односи, и дека е подготвена да помага во овој процес колку што ќе биде потребно. „Северна Македонија мора да ги промени уставните одредби за да продолжи процесот на пристапување. Тешка е работата, но верувам дека сите ќе придонесеме за нејзино решавање“, нагласи Кос.

Премиерот Христијан Мицкоски, во врска со посетата на претседателот на Европскиот совет, Антонио Кошта во мај, изјави дека е подготвен за разговори со Бугарија во кое било време за решавање на спорот околу внесувањето на Бугарите во Уставот.