Марш за ангелите денеска во Скопје – семејствата на жртвите од „Пулс“ бараат одговорност
Денеска во Скопје ќе се одржи „Марш за ангелите“, организиран од семејствата на настраданите во трагичниот пожар во дискотеката „Пулс“ во Кочани. Маршот ќе започне во 12:05 часот пред Обвинителството – како симбол на, како што велат, задоцнетата реакција на институциите – и ќе продолжи кон плоштадот „Македонија“, а ќе заврши пред Собранието.
Во своето соопштение, семејствата изразуваат разочараност од институциите:
– Ние заслужуваме одговори, ние не сме познавачи на правото и на законските процедури и затоа не разбираме како познавачите на правото притвораат, па пуштаат. Свесни ли се за и онака целосно разнишаната доверба во досегашното институционално работење со „фати, па пушти“, без да има јасно образложение за таа законска процедура, и што се создава во нашите мисли кои се на работ на себеуништување, се истакнува во пишаното известување од семејствата.
Тие најавуваат дека ќе продолжат со протестите и ја повикуваат целата јавност да им се придружи во борбата за вистината за смртта на нивните најблиски.
Од Обвинителството вчера беше упатен повик до семејствата на жртвите – доколку сакаат, денеска можат да остварат средба со јавниот обвинител и со обвинителите кои работат на случајот. Секое семејство може да одреди по еден свој претставник.
Во трагичниот пожар на 16 март загинаа 62 лица – 59 веднаш, а тројца подоцна од здобиените повреди. Речиси 200 лица беа повредени, дел од нив префрлени на лекување во странство. Меѓу жртвите беа и членови на музичкиот бенд „ДНК“, кој настапуваше таа вечер.
Истражната постапка за трагедијата ја водат 13 обвинители. Според Обвинителството, досега се извршени бројни претреси, сослушани се сведоци и собрани над илјада материјални докази. Под истрага се над 60 физички и три правни лица – меѓу кои и поранешни министри, градоначалници, полициски службеници и директори на институции.
