Манев: Палевски 10 дена ја следеше жената која требаше да ја киднапираме
Во Кривичниот суд денеска продолжи судењето за убиствата на 14-годишната Вања Ѓорчевска и на Панче Жежовски, а сведочи еден од обвинетите – Велибор Манев.
Манев одговараше на прашања на бранителот Горан Бошевски, каде откри дека требало да биде киднапирана жена на возраст околу 40 години, ќерка на фармацевт.
Истата била следена и фотографирана 10 дена.
„Претходно, месец и повеќе Палчо кажуваше повеќе особи за грабнување, еден од нив пензиониран бизнисмен. После тоа се одлучи на жена, на 40 годишна возраст, ќерка на некој од фармацевскиве куќи. Пред да се случи самото грабнување, 10-тина дена претходно ја следел, така ми кажуваше, да ги види навиките, каде излегува, каде оди, каде работи, и наводно ја сликал со телефон. Цело време ни ги покажуваше сликите на жената, на телефонот, навистина изгледаше на 38-40 години. Дали беше фотошопираа или не, не можам да кажам. Навистина староста не беше за дете“, вели Манев.
Според Манев, по кажување и организација на Палчо, жената симнувајќи се по скалите требало да се турне во сутернот на зградата надвор и таму да се врзе, но планот пропаднал откако од еден од дуќаните излегла жена.
Тој раскажа и како го извршиле киднапирањето на Вања, за која мислеле дека е истата жена која Палчо им ја покажувал на фотографии.
„Во 07.20 јас бев под скалите скроз, Боре чекаше со селотејп лента на раката ставена и кога се симнуваше особата Боре ја грабна со едната рака, а со другата и ја залепи устата и ја повлековме под скалите во потемното… Според слики кои ни ги кажувае и да ги гледаме на телефон, особата беше идентична. Беше таа која ни ја покажуваше. Ја врзавме, јас ставивме во вреќа за спиење, која претходно ја земавме од канцеларија, И така врзана, на Влатко му беше јавено да ја донесе колата пред влез, да го отвори гепекот за да може да ја ставиме во гепекот. Потоа продолживме да се движиме по насоките на Палчо. Стасавме до местото Дупки и го отворивме гепекот, Палчо ја праша како се вика, кој е татко, мајка од кој е, и откако тоа го дозна, ни рече да ја извадиме надвор од колата. За да ја слика и да може да прати слики на родителите и на фамилијата. Ја извадивме, ја откопчавме вреќата за спиење и салотејпот кога го тргнав, тогаш видов дека тоа е дете, а не жена“, вели Манев.
Осомничениот додава дека со Влатко му кажале на Палчо дека ова е грешка и треба да се пушти девојчето бидејќи се под маски и ги нема видено, но тој извадил перница и пиштол и пукал во детето.
