„Малолетниците масовно силуваат“: Подигнат аларм во една европска земја

Во ноември минатата година, група малолетници на закана со нож силувале 11-годишно девојче во тоалет во трговски центар во близина на Барселона. Во јуни 13-годишно девојче беше силувано од нејзините врсници во просториите на основно училиште во Мадрид.

Од 2015 година, Шпанија бележи постојан пораст на бројот на силувања извршени од малолетници. Минималната возраст за кривична одговорност во Шпанија е 14 години. Во Каталонија, бројот на малолетници помлади од 14 години вклучени во сексуални злосторства се удвоил меѓу 2015 и 2022 година. Помеѓу јануари и април оваа година, едно од осум лица уапсени за сексуални злосторства во Каталонија беше малолетно. Екстремната десница во пресрет на предвремените парламентарни избори кои ќе се одржат на крајот на овој месец побарала намалување на старосната граница за кривична одговорност, пренесува Јутарњи.хр.

Сепак, експерт од непрофитната организација Save The Children, Кармела дел Морал, предупредува дека зголемувањето на казните не е најдобриот начин да се реши овој „многу сложен проблем“.

„Нема едноставно решение како намалување на возраста за кривична одговорност и испраќање на сите малолетници во затвор“, вели Дел Морал.

Експертите предупредуваат дека еден од главните проблеми е тоа што малолетниците имаат лесен пристап до речиси неограничена понуда на порнографија. „Без квалитетно сексуално образование, младите и децата многу порано се свртуваат кон порнографски содржини. Тоа е како туторијал, како да одите на YouTube за да научите како да ја поправите дупната гума“, рече Едуардо Естебан, обвинител за малолетници. Околу 15 до 20 отсто од децата на возраст од осум до девет во Шпанија признале дека гледале порнографија на интернет.

„Особено забележлива е леснотијата со која пребарувачите нудат насилна порнографија која прикажува жени во покорни улоги кои никогаш не се контрадикторни и кои прифаќаат какво било однесување на мажите, без разлика колку бизарно е тоа. Ова ги нормализира групните напади, кои често се снимаат. Децата сега учат за секс преку порнографија. Исто како да научиле да возат гледајќи ги филмовите од серијата Брзи и бесни“, вели Дел Морал.

Според студијата на Save the Children од 2020 година, речиси седум од десет тинејџери редовно гледаат порнографија. Повеќе од половина рекле дека порнографијата ги инспирирала нивните сексуални искуства.

„Колку почесто гледаат порнографија, толку помалку ги задоволуваат нивните сексуални односи“, додава Дел Морал. Иако пристапот до порнографски содржини е теоретски забранет за оние помлади од 18 години, во практиката не постои таква контрола.