Македонија меѓу водечките земји во Европа по економски раст во четвртиот квартал
Македонската економија ја заокружи 2025 година со солиден раст, покажуваат најновите податоци на Државниот завод за статистика. Во четвртиот квартал бруто-домашниот производ (БДП) е зголемен за 3,5 проценти во однос на истиот период претходната година, со што се продолжува серијата од шест последователни квартали со позитивни резултати.
Министерката за финансии Гордана Димитриеска-Кочоска на прес-конференција истакна дека остварениот раст претставува континуитет на стабилните економски движења и се надоврзува на растот од 4,3 проценти во четвртиот квартал од 2024 година.
Според објавените споредбени податоци, земјава повторно се вбројува меѓу економиите со највисока стапка на раст во регионот и пошироко во Европа. Повисок економски раст во последниот квартал од 2025 година е регистриран само во Малта, Кипар и Полска. Во регионот, Србија бележи раст од 2,2 проценти, Хрватска 3,6 проценти, Бугарија 3 проценти, а Словенија 2 проценти.
Кумулативно, реалниот економски раст за целата 2025 година изнесува 3,5 проценти, што е во согласност со проекциите на Министерството за финансии. Буџетскиот дефицит останува на ниво од 4 проценти од БДП, додека јавниот долг е намален на 59,3 проценти од БДП.
Секторската анализа покажува дека растот е распределен на повеќе полиња. Градежништвото има највисока динамика со раст од 14,6 проценти, при што нискоградбата бележи зголемување од 12,5 проценти. Стручните и научните дејности растат за 8,1 процент, трговијата и транспортот за 4,4 проценти, а преработувачката индустрија за 3,6 проценти. Единствено земјоделството регистрира благо намалување од 0,4 проценти.
Значителен импулс доаѓа и од надворешната трговија, каде извозот на стоки и услуги е зголемен за 9,7 проценти. Приватната потрошувачка останува стабилна со раст од 2 проценти, поттикната од повисоките плати. Бруто-инвестициите бележат пад од 3 проценти, што се објаснува со високата споредбена основа од претходната година, кога во истиот период беше остварен раст од 23,7 проценти.
Од Министерството за финансии најавуваат дека економските политики ќе продолжат да се насочуваат кон поддршка на стопанството и одржување на фискалната стабилност, и покрај предизвиците и неизвесностите на меѓународната сцена.
