„ЛЕСНО Е СО 160 ИЛЈАДИ ДЕНАРИ ПЛАТА ДА КАЖЕТЕ ДЕКА СО 20 ИЛЈАДИ СЕ ЖИВЕЕ ДОБРО“ – што порачаа синдикалците од протестите
Синдикалците кои протестираа упатија неколку пораки до власта, да се зголемат платите и да се подобрат условите за работа.
На своите колеги синдикалци, пак, кои денеска не излегоа да протестираат, им порачаа да се засрамат.
Лесно е со 160.000 месечна плата да кажете дека со 20.000 се живее добро. Бараме 500 евра минимална плата помножена со коефициент за сложеност, порача од пред Владата претседателот на ССМ, Слободан Трендафилов.
„Ние сме тука, а квази-синдикалците се дома. Оваа Влада нема проблем со тие квази-синдикалци, ние имаме. Ветувам дека ќе дојдеме многу повеќе доколку не ја зголемат минималната плата“, истакна Трендафилов.
Бараме Владата да биде на страна на работниците, нејзините гласачи, а не на страна на газдите, додаде Трендафилов кој праша дали Владата сака евтина работна сила за да ги нуди на странските инвеститори како робови.
Лидерот на ССМ потсети дека минатата година актуелнава Влада, која тогаш беше опозиција, ги поддржуваше барањата на Синдикатот.
Срам да им е на „синдикатите“ кои не излегоа да протестираат, порача денеска од пред Владата Кристина Ампева.
Ампева спомна дека Македонија има најниска минимлна плата во регионот, најниска стапка на раст на економијата, а функционерите си ги зголемија платите за 79 отсто, службени возила, патни трошоци и слично.
„Покачете ја минималната плата на 500 евра веднаш!“, порача Ампева.
