Крмзови преку поврат на ДДВ испумпале 94 милиони евра од државата

Штетата што ѝ е нанесена на државата преку фиктивни зделки за поврат на ДДВ достигнува неверојатни 94 милиони евра, а зад операцијата стојат 15 фирми поврзани со семејството Крмзови од Струмица. Истрагата, која ја води Обвинителството за гонење организиран криминал и корупција, опфаќа и 23 физички лица, меѓу кои 4 сметководители и 8 инспектори од Управата за јавни приходи (УЈП).

Според обвинителката Верица Бержецка Крстева, фирмите склучувале фиктивни купопродажни договори за недвижности кои не биле ни во сопственост на продавачите. Простории се продавале и препродавале по вештачки надуени цени – и тоа по цени од 4.000 до 20.000 евра за квадрат.

„Се користеле и фиктивни консигнации и лажно уништување на градежна механизација. Целта била да се прикажат огромни трошоци и да се поврати ДДВ од државата“, рече Крстева.

Преку поврат на ДДВ, фирмите успеале да инкасираат 30 милиони евра, кои потоа биле користени за прикажување кредитна способност, подигање кредити, исплата на плати и изградба на објекти.

„Тешко е да се фати начинот на оперирање и поврзаноста на субјектите, бидејќи користеле лажна документација“, додаде обвинителката.

Државниот јавен обвинител Љупчо Коцевски случајот го нарече еден од најобемните што ги воделе до сега, додавајќи:

„Копаш, копаш и нема дно.“

Истрагата го опфаќа периодот од 2019 до 2024 година, но не се исклучува можноста таа да се прошири со нови индиции и актери.

Се што е во сопственост на фирмите и лицата поврзани со семејството Крмзови – неформално наречените “кралеви на текстилот” – е замрзнато, но засега не е сигурно дали тоа ќе биде доволно за да се покрие целокупната штета.