Крај на бумот на фриленсерите: Намален е нивниот број во Македонија и Албанија
Во првата половина од 2025 година, бројот на гиг-работници продолжи да се намалува поради комбинација од глобална економска несигурност, заситеност на пазарот, зајакнување на локалните можности за вработување и сè поизразена миграција на млади луѓе од регионот. Бројот на активни гиг-работници во Југоисточна Европа продолжи да се намалува во првата половина од 2025 година. Според најновите податоци на Gigmeter, кои денеска ги објави тимот на Центарот за истражување на јавни политики, бројот на работници на платформите се намалил за дополнителни 0,7 отсто.
Иако благ, овој пад е четврти по ред – сигнал дека бранот на раст е запрен. Работниците од областите на развој на софтвер и креативни услуги најмногу го напуштија дигиталниот пазар на трудот: дури 90 отсто од работниците што го напуштија пазарот доаѓаат од овие две професии.
„Промените што ги забележуваме не можат да се толкуваат изолирано“, вели Владан Ивановиќ, главен истражувач на Gigmetra и редовен професор на Економскиот факултет во Крагуевац, пренесува bizlife.rs.
Вели дека тоа е последица на комбинираниот ефект од глобалната економска неизвесност, побавниот раст и локалните фактори како што е зајакнувањето на домашниот пазар на трудот, кој денес нуди подобри можности за вработување стручна работна сила во споредба со претходниот период.
Upwork останува најдоминантната платформа со 55,6 отсто од вкупниот пазар, но нејзиниот удел е во опаѓање. Freelancer и Guru забележаа зголемување – особено Freelancer, со раст од 4,8 отсто.
Романија е единствената земја во регионот што забележа зголемување на бројот на работници на сите три платформи. Најголем пад е забележан во Албанија и Северна Македонија, и во апсолутни и во релативни бројки.
