„Козле“ е преполна, 80 деца се со пневмонија – грипот „коси“
Силниот бран на сезонски грип ги преполни болничките капацитети непосредно пред новогодишните празници. Клиниката за респираторни заболувања кај децата „Козле“ работи под полна пареа, а лекарите предупредуваат дека сликата е сериозна.
Дневно низ амбулантите на „Козле“ поминуваат и до 250 деца, а болничките кревети се речиси целосно пополнети.
Педијатарот д-р Мирјана Поповска објаснува дека овогодинешната инфлуенца е агресивна и веднаш ги соборува децата, за разлика од обичните настинки.
Таа предупредува дека грипот знае брзо да направи компликации во долните дишните патишта и масивен пневмоничен напад.
Лекарите апелираат родителите да не креваат паника за секоја температура, но будно да ја следат состојбата.
Слична е состојбата и на Клиниката за детски болести во Скопје, каде се хоспитализирани 130 деца со различна патологија. Медицинските тимови очекуваат бројот на заболени од респираторни инфекции дополнително да расте во наредниот празничен период.
