Кошаркарите поразени во Словачка – сега чекаме помош од Данска за да нема драма во Осло (ФОТО)

Крајната негатива е поголема од посакуваната негатива од најмногу три поени, која секако ни обезбедуваше едно од првите две места во групата кои водат во квалификациите, па сега пред жолто-црвените се две добитни комбинации. Првата е победа на Данска во вечерашниот дуел кај Норвешка, или, пак, победа в недела во Осло против норвешката селекција.

Словаците апсолутно заслужено дојдоа до триумф, со оглед што водеа речиси во целиот натпревар, во извесен период и со позитива од 20 и повеќе разлика. Избраниците на селекторот Александар Јончевски во финишот заиграа подобро, престанаа да форсираат шутеви за тројка, што донесе намалување на минус седум (70-77), но тоа е најмногу што успеаја да направат.

Големиот број тројки, вкупно 14 и доминацијата во играта под кошевите, која им донесе дури 13 скока повеќе (43-30) се главните причини за победата на Словачка, заедно со лошиот шут за три поени на македонскиот кошаркари, кои погодија само осум пат зад линијата 6,75 метри со дури 20 промашувања. Ако на ова се додаде и шутот од само 64-отсто од линијата за слободни фрлања, тогаш јасно е зошто загубивме во Левице.

Ти-Џеј Шортс блесна во второто полувреме и средбата ја заврши со 23 поени и шест асистенции, додека зад него беа Бојан Крстевски со 14 и Андреј Маслинко со 10 поени. Симон Крајчовиќ со 23 поени (пет тројки) беше најефикасен кај Словачка.

Македонија в недела ѝ гостува на Норвешка во Осло, а дали тој меч ќе има резултатско значење и какво ќе се знае по завршување на вечерашниот дуел помеѓу Данска и Норвешка (19 часот).