КОНЕЧНО УБАВА ЕКОНОМСКА ВЕСТ ОД ГЕРМАНИЈА: Производството се зголеми за прв пат по 9 месеци
Индустриското производство во Германија во јануари се зголемило за 1,0
отсто на месечна основа, покажуваат податоците на Сојузниот завод за статистика
на Германија (ДЕСТАТИС). Ова е прв раст во последните девет месеци и повеќе од
очекуваниот раст од 0,6 отсто.
Закрепнувањето доаѓа откако индустриското производство падна
за 2 отсто во декември 2023 година. Тоа го означува и најбрзиот раст на
индустриското производство од февруари 2023 година, поттикнат најмногу од
растот во хемиската индустрија (4,7 отсто), храната (5,9 отсто) и одржувањето и
монтажата на машините (11,1 отсто).
Од друга страна, автомобилската индустрија падна за 7,6
отсто. Производството бележи пораст кај интермедијарни производи (4,4 отсто) и
производи за широка потрошувачка (4,0 отсто), а опаѓање кај капиталните
производи (-2,1 отсто) и енергијата (-3,7 отсто). Во цела 2023 година
производствената индустрија бележи пад од 1,5 отсто. Сите податоци се
приспособени за промени во цената.
Во однос на јануари лани, индустриското производство во
јануари годинава е и понатаму за 5,5 отсто пониско, поправено за разликата во
цените и календарски и сезонски приспособено и за 6,3 отсто пониско од
просечното месечно индустриско производство во 2021 година.
Во градежништвото состојбата е уште полоша, иако во јануари
порасна за 2,7 отсто во однос на декември 2023 година. Но во однос на месечниот
просек во 2021 година и по прилагодувањето на календарските варијации, тој е за
7,4 отсто помал.
Енергетските интензивни индустрии почнаа да закрепнуваат
Производството во енергетски интензивните индустриски гранки
во јануари 2024 година е зголемено за 2,8 отсто во однос на декември 2023
година, сезонски и календарски приспособени. За овој раст значително придонесе
растот на хемиската индустрија.
Најенергетски интензивни гранки на индустријата се хемиската
и металната индустрија. Понатамошните енергетски интензивни економски сектори
вклучуваат производство на кокс и рафинирани нафтени производи и производство
на стакло, керамика, хартија и производи од хартија.
Овие индустрии имаат особено високи барања за енергија во
однос на нивната бруто додадена вредност. Во референтната 2021 година, тие
заедно учествуваа со 77 отсто од вкупната индустриска потрошувачка на енергија.
Нивното учество во бруто додадената вредност на индустријата изнесуваше 17
отсто. Во 2021 година, нешто помалку од еден милион луѓе (929.599) биле
вработени во 6.986 индустриски погони на компании кои работат во енергетски
интензивни индустрии во Германија.
ФОТО: Unsplash/Claudio Schwarz
