КОЛКУ ТРЕБА ДА ПЛАТИТЕ ЗА ДА ГИ ИМАТЕ – една банка „тежи“ 460 милиони евра, а една фармацевтска компанија 420 милиони
Берзата го објави својот најнов билтен за март, а во него, како и секогаш, можат да се најдат интересни податоци за акциите на компаниите кои котираат на пазарот на капитал.
Направена е анализа на тоа каква пазарна капитализација имаат компаниите чии акции се најтргувани на Македонската берза во текот на март.
Од неа излегува дека банките се секогаш и меѓу најтргуваните акции, но и меѓу компаниите со највисока пазарна капитализација.
Пазарната капитализација ја означува моменталната вредност што некој би требало да ја плати доколку сака да ги купи сите акции на таа банка или компанија одеднаш.
Овде треба да напоменеме и дека ние ја правиме анализата врз основа на тоа кои најтргувани акции имаат највисока пазарна капитализација, што значи дека има и компании кои можеби имаат и повисока пазарна капитализација од некои од наведените на листава, но не се на овој список, бидејќи во март за кога е правена анализата, нивните акции не биле меѓу најтргуваните.
Инаку, според листата, најголемата банка во земјава, која има и најголема актива, Комерцијална банка, имала и највисока пазарна капитализација во март.
Или, нејзината пазарна капитализација изнесува 459,3 милиони евра, говорат податоците на Берзата. Што значи дека толку пари би требало некој да плати доколку во март сакал да ги откупи сите акции издадени од Комерцијална банка одеднаш.
Следува фармацевтскиот гигант „Алкалоид“, пак, кој во март имал пазарна капитализација од 417 милиони евра. Една од најуспешните компании во земјава, чии акции секогаш се меѓу најбараните меѓу инвеститорите.
Потоа се две банки, кои имаат многу мала разлика во пазарната капитализација. Па така, трета е Стопанска банка Скопје, чии акции доколку се продале одеднаш, за нив би се зела сума од 373,6 милиони евра.
И веднаш зад неа според пазарната капитализација е НЛБ Банка, со пазарна капитализација од 369,2 милиони евра.
Меѓу најтргуваните акции е и „Макпетрол“, со пазарна капитализација од 121,7 милиони евра, додека, пак, на таа листа е и „Гранит“, со пазарна капитализација од 60 милиони евра. УНИБанка е следна на листата, со пазарна капитализација од 43,5 милиони евра, додека, пак, „Реплек“ има капитализација од 34,56 милиони евра.
ТТК Банка има пазарна капитализација од близу 20 милиони евра, додека Стопанска банка Битола има пазарна капитализација од 16,5 милиони евра.
Н.Н.Ф.
