Колку пари ќе ни донесе усвоениот Закон за глобален минимален данок на добивка?
Во Собранието е усвоен Законот за глобален мминимален данок на добивка, а според експертите тоа на Македонија треба да и донесе дополнителни околу 30 милиони евра на годишно ниво. Станува збор за дополнително оданочување од 5 процентни поени на домашни компании зад кои стојат мултинационални корипорации кои имаат годишен обрт од над 750 милиони евра. Како што претходно најавија експертите, данокот ќе се наплаќа од 2026, но ќе важи за резултатите од оваа година.
– Како што најави премиерот Мицкоски, до крајот на 2024, на предлог на Владата и Министерството за финансии, Собранието го усвои Законот за глобален минимален данок на добивка. Со пропишувањето на обврска за плаќање квалификуван домашен дополнителен данок се заштитува даночната основа во Република Македонија.
Мултинационалните компании кои вршат дејност во Република Македонија, дополнителниот данок ќе им се наплати во нашата земја, а не во земјата каде што мултинационалната компанија има седиште, објави заменик министерот за финансии Николче Јанкуловски на социјалните мрежи.
Според стручњаците, тоа би бил мал број на такви компании во Македонија, а а како што претходно најави премиерот Христијан Мицкоски, се работи за корпорации од типот на Телеком, А1 Македонија, Цементара, ЕВН и евентуално некои други.
– Кај нас има три типа такви компании. Првиот тип се оние кои користат даночни олеснувања и се во слободните економски зони, втори се оние кои користат даночни олеснувања, но се надвор од овие зони и третиот тип се компании кои даваат услуги на слободниот пазар, на пример Телеком, А1, Цементара, ЕВН итн. Тие мора да платат 15 проценти данок. Според македонскиот даночен систем данокот е рамен и изнесува 10 отсто. Што ќе се случи? Компаниите оствариле профит од 100 парички, од кои ќе платат 10 парички тука, во Македонија, а останатите 5 ќе мора да ги платат во матичната држава. Тоа не е фер. Ако тие профитираат од македонските граѓани, ако македонските граѓани ги плаќаат сметките, тогаш треба тие 15 проценти да ги плаќаат тука – рече Мицкоски.
Владата, додаде тој, ги информирала компаниите кои ги исполнуваат овие услови и тие немале нипто против.
