Кои се бизнисмените кои ќе менаџираат со „Македонско село“?
Бобан Стојановиќ и Христијан Милковски се скопските бизнисмени кои ќе менаџираат со комплексот „Македонско село“ во Горно Нерези на Водно, кој што Службата за заеднички и општи работи на Владата повторно го даде под концесија.
Двајцата бизнисмени на 10 јуни ја основале фирмата „ХСХ Вилиџ Груп Скопје“ на адресата каде што е „Македонско село“ со дејност хотелско сместување, а Стојановиќ е управител на новоформираното друштво.
СОЗР претходно ja прифати понудата за концесија од 15 години на ХСХ Груп ДОО Скопје, познати во угостителскиот сектор по локалот „Ла тераца“ на скопскиот Плоштад „Македонија“ и по истоимениот хотел во Дојран. Ова друштво за производство, угостителство, трговија и услуги постои од мај 2012 година. Основано е од Оливера Милковска, која е мнозински сопственик, а содружник и управител е Саша Ќипровски.
На државата ќе и плаќа месечен надомест од 3.500 евра. Изборот е направен по пат на електронско јавно наддавање, преку системот со кој управува и оперира Министерството за финансии..
За директорот на Службата за општи и заеднички работи Ивица Томовски нема ништо спорно во тоа што е формирана уште една фирма. Поради состојбата на запуштеност и потребата од реновирање, концесионерот од септември ќе стартува со плаќање на закупнината.
– Ние потпишавме договор со фирмата која е веќе позната во јавноста по „Ла тераца“, а понатаму како тие меѓусебно ќе ги уредуваат односите не е спорно за нас. За нас најважно е да се почитуваат обврските од концесијата, а во знак на добра волја на концесионерот му дадовме неколку месеци период да го досреди местото без да плаќа за тој период, ни рече Томовски.
По седум години неработење и затворени врати, комплексот „Македонско село“ кое е лоцирано на падините на планината Водно во Горно Нерези, ќе биде одново отворен за посетители на 23 јуни. Денеска претпладне ќе биде официјално предаден на новиот концесионер.
Mесечнаta кирија од 3.500 евра плаќаше и претходниот закупец хотел „Квинс“ и „Тинекс“ на ексградоначалникот на Општина Центар Владимир Тодоровиќ, кои во јануари 2016 го добија под концесија од 20 години, но во октомври 2018 престанаа со работа бидејќи, како што соопштија, работеле со загуба и во договорот дека имало таква опција за раскинување.
Според официјалните податоци, Владата во изградба на селото вложи 5,2 милиони евра. Дополнителни 1,3 милиони евра беа потрошени за внатрешно уредување.
A.K
