„Кој ве повика?“ – им рекоа во полицијата во Демир Хисар на директорката Лозановска и адвокатот кога дојдоа на информативен разговор
„Кој ве повика?“ — со ова прашање, според тврдењата на СДК.МК, биле пречекани директорката на Гимназијата во Демир Хисар, Маја Лозановска, и нејзиниот адвокат Жаре Стевановски, кога утрово дошле на информативен разговор во полициската станица.
Стевановски изјави дека им било предложено случајот да се води како самопријавување, но тие одбиле, укажувајќи дека уште при претресот во петокот, а потоа и телефонски, биле повикани да се јават во вторник. Сепак, денес им било соопштено да дојдат на нов разговор утре, 13 август.
Лозановска и Стевановски поднеле кривична пријава за самовластие, бидејќи директорката сè уште нема добиено решение за разрешување, а новоназначената в. д. директорка веќе влегла во училиштето.
„Според решение од Централниот регистар, Лозановска сè уште е директорка,“ изјави адвокатот.
На 8 август полицијата извршила претрес во домот на директорката Маја Лозановска барајќи го печатот на училиштето, иако таа била на боледување. Началникот на полицијата дури изјавил дека ќе ја донесе и на носилки на информативен разговор, иако немало налог за лишување од слобода. МВР подоцна покрена дисциплинска постапка против него, а против Лозановска била поднесена пријава за „одземање печат и службени документи“. Четири дена пред претресот, градоначалникот ја разрешил по налог на Просветниот инспекторат, но нејзиниот адвокат тврди дека целта била назначување нова в. д. директорка пред локалните избори на 19 октомври.
ФОТО: СДК.МК
