Кој, како и зошто ги крева цените на најдобрите македонски акции? Инвеститори реалоцираа неколку милиони евра за еден месец
Растот на цените на најреспектабилните четири до пет акции на Македонската берза во голема мерка е предизвикан од големите пари кои овој месец (ноември н.з.) се свртеа од продажба на акции во „Македонијатурист“. А станува збор за обрт повисок од 20 милиони евра. Дел од тие пари очекувано извршија позитивен притисок врз цените на акциите на “Алкалоид“, „Макпетрол“, „Комерцијална банка“, „Стопанска банка Скопје“, НЛБ Банка затоа што овие компании имаат изразита, предвидлива и препознатлива развојна компонентна во комбинација со беспрекорна дивиденда репутација
Интензивно растат цените на „блу чип“ акциите на Македонската берза за хартии од вредност. „Алкалоид“ се бара на цена повисока од 25.000 денари, „Комерцијална банка“ исто се тргува на рекордно високо ниво од 25.000 денари за акција, НЛБ Банка ја проби психолошката граница од 50.000 денари за акција, а „Макпетрол“ се тргува по цена што е повисока од 87.000 денари за акција.
Сега се будат и помалку ликвидните акции од берзанскиот барометар односно индексот МБИ-10 , а тоа се „Стопанска банка Скопје“, ТТК Банка и секако „Гранит“.
Притисокот врз цените на најдобрите македонски акции е толку силен и интензивен што нивното влијание го враќа и МБИ 10 близу рекордната историска маргина од 10.000 поени. Последната вредност на МБИ -10 пред објавата на овој текст е речиси 9.350 поени.
Кој ги подигна цените на најдобрите македонски акции?
Реално гледано клучен катализатор за раст на цените на најдобрите македонски акции, во значајна мерка, се парите кои се свртеа на берзата од продажбата на акции во скопска „Македонијатурист“.
Веќе е очигледно дека таму има силна и интенвизна концентрација на капиталот во, барем досега, петкомпании. Сега најголем поединечен акционер е „Скопски пазар“, па тука се скопските фирми „Промедика“, „Фешн МГ“ и „Чеза комерц“. Од акционерската структура истапија пензискиот фонд на „Сава“, Соња Бибановска, а во значајна мерка и Доне Таневски најголемиот потенцијален акционер, а легалноста на неговата продажба ја проведува регулаторот Комисија за хартии од вредност (КХВ).
Увидот во официјалните податоци за ноември покажува дека со акции на „Македонијатурист“ се свртеа над 20 милиони евра. Убедливо најголем ќар од тоа имаше Доне Таневски, Соња Бибановска и идните пензионери кои преку пензискиот фонд на „Сава“ ги зголемија своите вложувања во идни пензии за над 3,6 милиони евра.
Можеби не се големи, но бројни акционери кои продадоа акции во „Македонијатурист“ во овој период направија алокација на своите вложувања во најугледните македонски акции членки на МБИ – 10 односно оние што се најликвидни и со беспрекорна дивидендна репутација.
А сите искрени аналитичари и хроничари на состојбите на нашиот пазар на капитал може само да ги радува тоа што дел од вложувањата во „Македонијатурист“ сега инвеститорите ги пренесуваат во некоја и неколку други најквалитетни акции. Затоа што очекувањата од нив се: умерен раст на пазарната цена базиран на среднорочен раст на резултатите, редовна дивиденда во иднина која поради очекуваните растови на продажбите ќе расте од година во година.
Токму овој тренд на вложувања укажува на зголемена зрелост на инвеститорите на македонскиот пазар на капитал, нешто што може само да им годи на искрените хроничари и аналитичари на берзанските состојби во Македонија.
Р. Ф.
