КФОР ДО КУРТИ ЗА БАЈРАКТАРИТЕ: Воздушниот простор само ние го контролираме

КФОР се огласи по повод новите оружја кои ги набави Косово. 

КФОР реагираше до косовскиот премиер Албин Курти за добиените беспилотни летала од Турција и велат дека воздушниот простор само тие го контролираат. 

Мисијата на КФОР денеска информира дека примарна одговорност за воздушниот простор над Косово е на командантот на КФОР, врз основа на резолуцијата 1244 на Советот за безбедност на ОН.

КФОР соопшти дека горниот воздушен простор на Косово може да се користи „само за летање од една во друга земја со комерцијални летови“, а долниот воздушен простор може да се користи и за специјални летови, од случај до случај и со претходно одобрение од командантот на КФОР.

КФОР е целосно фокусиран на обезбедување безбедна средина и слобода на движење за сите заедници на Косово и Метохија, во согласност со неговиот мандат.

„КФОР продолжува да го поддржува развојот на Косовските безбедносни сили, во рамките на нивниот првичен мандат, вклучително и операции за цивилна заштита како гаснење пожари, уништување експлозивни направи, пребарување и спасување и одговор на излевање на опасен материјал“, се вели во соопштението.

Косовскиот премиер во неделата објави дека армијата добила беспилотни летала Бајрактар ​​ТБ-2 купени од Турција.

Министерот за одбрана на Србија, Милош Вучевиќ вели дека е неспорно дека поединечни членки на НАТО во последно време „многу посериозно“ го вооружуваат Косово. 

Министерот за одбрана Арменд Мехај ги повика граѓаните да придонесат за инвестирање во Косовските безбедносни сили (КБС) со донирање во Фондот за безбедност. Мехај на Фејсбук пишува дека со вооружувањето ја гарантираат безбедноста на државата. 

фото Фејсбук / Албин Курти