Касами вели време е за претседател Албанец: „Идеален е Таравари“

Претседателот на Беса, Биљал Касами во интервју за весникот Лајм порача дека е дојдено времето за претседател Албанец на Македонија.

Според него, идеален кандидат за оваа функција е претседателот на Алијанса за Албанците, Арбен Таравари.

„Многу искрено разговаравме со докторот Арбен, тој дa е кандидат за претседател. Ја знаеме неговата загриженост за овие случувања во рамките на Алијансата. Сметам дека ова треба да заврши, а не да продолжи на ниво на закани и уцени. Во таа насока, посакувам што поскоро да се расчистат сите дилеми во Алијансата и силно верувам дека д-р Арбен Таравари може да биде многу добар кандидат за претседател не само на албанската опозиција, туку и кандидат за кој верувам дека би било прифатлив за сите граѓани на Северна Македонија и верувам дека С. Македонија е подготвена за претседател Албанец со целосен политички мандат, а не како симболиките што ДУИ ги понуди за овие 20 години владеење, што кулминираше со оваа техничка влада каде што имаме премиер Албанец, половина влада Албанци, но Албанците се подискриминирани од кога било“, вели Касами.