Камбовски: Набрзо ќе биде избран нов претседател на Врховниот суд
Набрзо ќе биде избран вршител на должноста претседател на Врховниот суд, но изборот се одложи поради неопходноста од спроведување на постапките за интегритет и психолошки тестови, изјави денеска претседателот на Судскиот совет, Александар Камбовски.
Како што посочи Камбовски, комисијата не успеала да ги заврши сите потребни тестови на кандидатите, бидејќи имало повеќе од 70 кандидати кои требало да бидат тестирани од Академијата. Според него, приоритетот бил даден на кандидатите од Академијата, поради што постапката за избор на претседател се пролонгирала.
„Но, изборот ќе биде направен многу брзо. Тоа ќе се случи на следната седница на Судскиот совет, бидејќи во среда истекува мандатот на актуелниот претседател на Врховниот суд“, додаде Камбовски.
Одговарајќи на новинарско прашање дали денешната и утрешната седница на Судскиот совет се користат како алиби за членовите на Судскиот совет кои се под интерпелација и не присуствуваат на седницата на Собранието, Камбовски категорично негираше. Тој нагласи дека закажувањето на седницата на Судскиот совет било направено пред да биде познато кога ќе се одржи собраниската седница.
„Наша седница не ја пречи собраниската и обратно. Доколку некој од колегите изрази желба да присуствува на собраниската седница, ние ќе ја прекинеме нашата и ќе почекаме да се врати. Нема да има никаква пречка ниту на Собранието, ниту во Судскиот совет“, изјави Камбовски.
Тој додаде дека членовите на Судскиот совет за кои се бара интерпелација сами ќе одлучат дали ќе присуствуваат на собраниската седница или не.
„Тоа е нивен избор и не можам во нивно име да кажувам што ќе одлучат“, додаде Камбовски.
Во однос на можните оставки на членовите на Судскиот совет, Камбовски нагласи дека тоа е индивидуална одлука и не може да предвиди што ќе одлучат колегите.
„Не знам дали некој ќе поднесе оставка. Тоа е личен акт, не можам да очекувам или да претпоставувам што ќе направат колегите“, рече Камбовски.
Потврди дека има поднесено кандидати за судии во сите судови, но нагласи дека нивниот избор нема да ги реши сите проблеми, туку само ќе ги ублажи.
„Сеуште треба повеќе судии во основните судови. Овој избор ќе го ублажи проблемот, но не го решава целосно“, истакна Камбовски.
