Каматите растат, цената на нафтата паѓа
Цените на нафтата на светските берзи минатата недела паднаа за повеќе од 3,5 отсто, што берзанските аналитичари го гледаат како последица на зголемувањето на каматните стапки поради високата инфлација и оценуваат дека ваквата политика на централните банки може дополнително да го забави економскиот раст а со тоа и намалување на побарувачката.на нафта.
Барел на лондонскиот пазар поевтини за 3,6 отсто – на 73,85 долари, а на американскиот пазар нафтата е уште поевтина – за 3,7 отсто, или на 69,16 долари за барел.
Шефот на американската централна банка Џером Пауел најави зголемување на каматните стапки за да се потисне инфлацијата, а цената на парите ја зголемуваат и централните банки на многу други западни земји. Британската и норвешката централна банка ги зголемија каматните стапки за по 0,50 процентни поени.
Швајцарската централна банка исто така ги зголеми каматните стапки, а економските експерти предвидуваат дополнително зголемување на каматните стапки во еврозоната.
Ова дополнително би можело да го забави растот на економијата, што последователно би се одразило на падот на побарувачката на нафта и можно ново намалување на цената на светските берзи.
